घरजग्गा कारोबार आधा घट्यो

पछिल्लो छ महिनामा काठमाडौं उपत्यकामा घरजग्गाको किनबेच झन्डै आधाले कमी आएको छ । भूमिसुधार तथा व्यवस्थापन विभागका अनुसार उपत्यकामा गत आर्थिक वर्षको पहिलो छ महिनाको तुलनामा दोस्रो छ महिनामा कारोबार झन्डै आधाले घटेको हो ।
विभागले उपत्यकाको घरजग्गा दर्ताबाट सरकारले पाउने राजस्व आर्थिक वर्ष ०६६÷६७ को पहिलो अर्धवार्षिक अवधिको तुलनामा दोस्रो अवधिमा झन्डै आधाले घटेको जनाएको छ । प्राप्त तथ्यांकअनुसार बितेको आवमा उपत्यकाका तीन जिल्लाका पाँच मालपोत कार्यालयबाट ३ अर्ब ३ करोड रुपैयाँ राजस्व उठेको थियो । त्यसमध्ये वर्षको पुस मसान्तसम्म १ अर्ब ९५ करोड रुपैयाँ उठेकामा पछिल्लो अर्धवार्षिक अवधिमा १ अर्ब ७ करोड रुपैयाँमात्र उठेको छ ।
अर्थतन्त्रका सबैजसो परिसूचक निराशाजनक हुँदा पनि घरजग्गाको मूल्यमा देखिएको अस्वभाविक वृद्धि नियन्त्रण गर्न अवलम्बन गरिएको अनुदार नीतिले सरकारले देशभरबाट पाउँदै आएको दर्ता शुल्क एक अर्बभन्दा बढीले घटेको छ ।