कारोबार संवाददाता
मंगलबार, जेठ २९, २०७५
1913

यातायात क्षेत्रमा सिन्डिकेट अन्तसँगै विभिन्न रुटमा यातायात सेवा विस्तार हुँदै गर्दा ललितपुरको लामाटारबाट काठमाडौंको बूढानीलकण्ठसम्म बस सेवा सञ्चालनमा आएको छ । ‘हामी सबैको यातायात’ ले बस सञ्चालनमा ल्याएको हो । सोमबार ललितपुरको लामाटारस्थित पाटीचौरमा महालक्ष्मी नगरपालिकाका मेयर रामेश्वर श्रेष्ठ, महानगरीय प्रहरी वृत्त सातदोबाटोका प्रहरी नायव उपरीक्षक विनोद सिलवाल, वरिष्ठ पत्रकार ऋषि धमला, महालक्ष्मी नगरपालिका–९ का वडाध्यक्ष वासुदेव शर्मा, ८ का वडाध्यक्ष विश्वराज श्रेष्ठ र ७ का वडाध्यक्ष नहकुल थापाले संयुक्त रूपमा बस सेवाको शुभारम्भ गरेका थिए ।
२७ सिटको टाटा कम्पनीको १३ वटा बसले सोमबारबाट पाटीचौर, धाराचौर, शंखादेवी, विष्णुडोल, सिद्धिपुर, इमाडोल, ग्वार्को, सातदोबाटो, लगनखेल, रत्नपार्क, महाराजगन्ज हुँदै बूढानीलकण्ठसम्म र फर्केर इमाडोलबाट आई टीकाथली, चाङ्गथली, लुभु, डाँडाथोकबाट पाटीचौर हुँदै धाराचौरबाट सिद्धिपुर निस्कनेगरी दायाँ र बायाँ दुईतर्फी सवारी सञ्चालनमा ल्याएका छन् । मनोरम प्राकृतिक सुन्दरताले भरिएको ललितपुरको पर्यटकीय क्षेत्र शंखादेवी र लामाटार क्षेत्रलाई धार्मिक पर्यटकीय स्थान काठमाडौंको बूढानीलकण्ठसँग बस सेवामार्फत सीधा जोडेको छ । यसबाट आन्तरिक पर्यटनमा समेत टेवा पुग्नेछ ।
बस सेवाको सुरुमै उत्साह देखिएको छ । अबको दुई महिनाभित्र ३६ वटा बस सञ्चालनमा आउने हामी सबैको यातायात कम्पनीका अध्यक्ष मोहन सापकोटाले बताए । बस सेवा सञ्चालनमा आएपछि स्थानीयवासीमा उत्साह छाएको छ । बस सेवा उद्घाटनमा महिला, वृद्धवृद्धाको समेत उल्लेख्य उपस्थिति थियो ।