कारोबार संवाददाता
मंगलबार, जेठ २९, २०७५
422

सञ्चार तथा सूचना प्रविधिमन्त्री गोकुल बास्कोटाले सरकारले विद्युतीय साक्षरता बढाउन सूचना प्रविधिसम्बन्धी कार्यक्रमलाई स्थानीय सरकारका प्रत्येक तहमा सुरु गर्न लगेको बताएका छन् । नेपालमै पहिलो पटक मण्डन–देउपुर नगरपालिकामा सुरु गरिएको एकीकृत सूचना प्रविधि सेवा केन्द्रको उद्घाटन गर्दै मन्त्री बास्कोटाले सरकार आफै ‘पेपर लेस’ अभियानमा लागेको बताए ।
“नेपालमा ३१ प्रतिशतमात्रै विद्युतीय साक्षरता छ, यसलाई आगामी दिनमा ५० प्रतिशत पुराएर कानुनी मान्यता दिने तयारी गरिएको छ,” मन्त्री बास्कोटाले भने । उनले नेपाल सरकारले प्रदान गर्ने अधिकांश सेवा/सुविधा अनलाइन/इन्टरनेटमार्फत प्रवाह गर्न उक्त कार्यक्रम उपयुक्त र सहज हुने बताए ।

कार्यक्रममा जिल्ला समन्वय प्रमुख उद्धव केसी, प्रमुख जिल्ला अधिकारी कृष्णबहादुर राउत, नगर उपप्रमुख निर्मला शाही, प्रमुख प्रशासकीय प्रमुख भिमकान्त शर्मालगायतले एकीकृत सेवाबाट नागरिकले थप सेवा प्राप्त गर्ने बताए ।
यसैबीच मन्त्री बास्कोटाले हिगुवापाटी–ज्याम्दी–दोलालघाट सडकको शिल्यान्यास गरे । २१ करोड ३२ लाख ४५ हजार रुपैयाँमा निर्माण हुने सडक २० किमि लम्बाइ, साढे ६ मिटर चौडाइ, साढे ७ मिटर दुईतर्फी नालीसहित निर्माण हुनेछ । सडकको अधिकार क्षेत्र दाँयाबाँया १०/१० मिटर गरी २० मिटर सडक कायम गरिएको छ । सडक निर्माणसँगै सडक चौडा पार्ने, स्लाब कल्भर्ट, पाइप कल्भर्ट, सिँचाइ कसिङ, टेवा पर्खाल, माटो खन्ने कार्य र ग्राभेल गर्नु पर्नेछ । राष्ट्रिय पुनर्निर्माण प्राधिकरण केन्द्रीय आयोजना कार्यान्वयन इकाई, जिल्ला आयोजना कार्यान्वयन इकाईबाट पुनर्निर्माण तथा स्तरोन्नति गर्न लागिएको हो ।