कारोबार संवाददाता
सोमवार, माघ २८, २०७५
283

सत्तारुढ दल नेपाल कम्युनिष्ट पार्टी (नेकपा) का स्थायी समिति सदस्य देवेन्द्र पौडेलले भेनेजुएलामा जारी राजनीतिक संकटलाई लिएर नेकपा सचिवालयले सार्वजनिक गरेको धारणा नै आधिकारिक रहेको स्पष्ट पारेका छन् । आइतबार रिपोर्टर्स क्लबले आयोजना गरेको साक्षात्कारमा उनले भने, “यो विषयमा पार्टीको सचिवालयले सार्वजनिक गरेको धारणा नै आधिकारिक हो । यसमा अब अल्झिनुपर्दैन ।”
नेता पौडेलले यो विषयमा पार्टीका अध्यक्ष पुष्पकमल दाहालले विज्ञप्ति जारी गरेर भयानक गल्ती नगरेको पनि स्पष्ट पारे । उनले भने, “नेपालस्थित अमेरिकी राजदूत र हाम्रो पार्टीका अध्यक्ष प्रचण्डबीच हिजो एक्लाएक्लै भेटवार्ता भइसकेको छ । राजदूतसँगको भेटमा हाम्रो अध्यक्षज्यूले वक्तव्य यो स्पिरिटमा आएको हो भनेर भनिसक्नुभएको छ । अब यो समस्या हल भयो ।”

अमेरिकी राजदूतले प्रचण्डलाई अमेरिका भ्रमणको निम्तोसमेत दिइसकेको उनले खुलासा गरे । उनले भने, “सबै कुरा मिलिसक्यो । सहमति भैसक्यो । अब यसलाई अनावश्यक रुपमा उचाल्नुहुँदैन ।” पौडेलले शनिबारमात्रै नेकपाका अध्यक्षद्वय केपी शर्मा ओली र प्रचण्डबीच तीन घण्टा लामो भेटवार्ता भएको जनाए । उनले भने, “उहाँहरुबीच मिलेर जाने सहमति भएको छ । अहिले देखिएका सबै समस्या हल गरेर जाने सहमति भएको छ ।”
प्रधानमन्त्री ओली र अध्यक्ष प्रचण्डबीच आगामी दिनमा मिलेर जानेबारे गम्भिर कुराकानी भएको पनि पौडेलले जनाए । उनले भने, “सरकार सञ्चालन गर्दा मिलेर अघि बढ्ने र निर्णय गर्दा सल्लाह गर्नेबारे उहाँहरुबीच सहमति भएको छ । पार्टी एकीकरणको कामलाई दुवै अध्यक्षले पहलकदमी लिने र फत्ते बनाउने पनि गम्भिर कुरा भएको छ । पार्टीभित्र अन्तरसंघर्षमा नफस्नेबारे पनि उहाँहरुबीच कुरा भएको मैले पाएको छु ।”
फरक प्रसंगमा उनले पूर्व प्रधानमन्त्री, प्रधानमन्त्री, परराष्ट्रमन्त्रीले वक्तव्य जारी गर्दा शब्दहरु ख्याल गर्नुपर्नेमा जोड दिए । उनले भने, “शब्दहरुको ख्याल पु¥याउनुपर्छ । अरु कुनै पनि राष्ट्रलाई चिढ्याउनु हुँदैन ।” उनले नेपालले शान्ति प्रक्रिया मौलिक ढंगले टुंगो लगाउने काम गरिरहेको सुनाए । तर, केही अन्तर्राष्ट्रिय शक्ति केन्द्रहरु र केही संघ÷संस्थाहरुले यो विषयलाई उचाल्ने काम गरेको उनको आरोप छ ।
नेता पौडेलले वर्तमान सरकार गठन भएको एक वर्ष पुग्न लागेको सुनाउँदै यो एक वर्षको कार्यकाल हेर्दा सरकार सापेक्षित रुपमा सफल भएको दाबी गरे । उनले भने, “सरकारको एक वर्ष सापेक्षित रुपमा सफल छ । तर, उत्साहजनक छैन ।” यद्यपि उनले सरकारले गम्भिर गल्ती नै भने नगरेको जिकिर गरे । उनले थपे, “सरकारले यो अवधिमा केही कामहरु गर्न प्रयत्न गरेको छ । त्यही भएर असफल नै भनेर भन्न मिल्दैन । दुई तिहाइको सरकार छ । त्यही भएर जनताका असीमित चाहनाहरु छन् । ती चाहनाहरु सम्बोधन नहुँदा आलोचनाको मात्रा बढेको हो ।”
पौडेलले अर्को बजेट ल्याउँदा सरकारको काम तिव्रताका साथ अघि बढ्ने विश्वास दिलाए । उनले भने, “त्यहीअनुसारको होमवर्क भैसकेका छन् ।”