कारोबार संवाददाता
आइतवार, असार २४, २०७५
274

नागरिक उड्डयन प्राधिकरणले बुद्ध एयरको नेपालगन्ज दिल्लीको उडान तालिका आगामी पुस १७ अर्थात् जनवरी १, २०१९ देखि लागू हुने गरी स्वीकृत गरेको छ ।
यसअघि बुद्ध एयरले नेपालगन्जबाट भारतको राजधानी नयाँदिल्लीका लागि दैनिक ३ उडान बिहान ६ः३०, दिउँसो १ र साँझ ५ः१० बजेका लागि संस्कृति पर्यटन तथा नागरिक उड्डयन मन्त्रालयमा पत्राचारसहित अनुरोध गरेको थियो ।
यसै क्रममा पर्यटन, संस्कृति तथा नागरिक उड्डयन मन्त्रालयको अनुरोधमा परराष्ट्र मन्त्रालयले भारत सरकारलाई बुद्ध एयरलाई नेपालगन्जबाट दिल्ली उडानका लागि पत्राचार गरेको छ ।
बुद्ध एयरले उडानका लागि आफ्नोतर्फबाट व्यापक गृहकार्यहरू गरिरहेको प्रेस विज्ञप्तिमा जनाएको छ । दिल्लीमा संसारभरिका एयरलाइन्स र यात्रु पर्यटकहरूको व्यापक आवाजाही हुने गरेको छ ।
यसैलाई ध्यानमा राखी बुद्ध एयरले विभिन्न एयरलाइन्सहरूसँग अन्तरदेशीय टिकट बिक्री वितरणका लागि इन्टरलाइन र जीडीएस प्रणाली अध्ययन र लागू गर्नका लागि विभिन्न कम्पनीहरूसँग पत्राचार गरेको छ ।
यस उडानबाट सुदूरपश्चिम र पश्चिमका जनताहरू प्रत्यक्ष लाभान्वित हुनेछन् । बर्दिया, शुक्लाफाँटा निकुञ्ज, मनोरम हिमश्रृंखला, खप्तड, स्वर्गद्वारी रारा, तिलिचो तालतलैयाले पर्यटकहरूलाई पनि आकर्षित गर्ने दाबी बुद्ध एयरले गरेको छ ।नेपालगन्ज–नयाँदिल्लीको उडान लगत्तै बुद्ध एयरले नेपालगन्ज–पोखराको दैनिक उडान पनि भर्ने विज्ञप्तिमा जनाएको छ ।