लुसाकामा नेपालको पर्यटन प्रवद्र्धन
कारोबार संवाददाता
बुधवार, असार २७, २०७५
171

गैरआवासीय नेपाली संघ जाम्बियाले नेपाली दूतावास दक्षिण अफ्रिकाको सहयोगमा, मुलुंगुसी अन्तर्राष्ट्रिय सम्मेलन केन्द्र, लुसाका, जाम्बियामा हालै नेपालको पर्यटन प्रवद्र्धनसम्बन्धी एक विशेष कार्यक्रमको आयोजना गरेको छ । कार्यक्रममा जाम्बिया विश्वविद्यालय, संयुक्त राष्ट्रएजेन्सीहरू, आईएलओ, यूएनएड्सज तथा अन्तर्राष्ट्रिय संस्थाहरू र स्थानीय उद्यमी, वकिल र सञ्चारकर्मीहरूको प्रतिनिधित्व रहेको एनआरएनए एनसीसी जाम्बियाले जनाएको छ ।
कार्यक्रममा जाम्बियाको परराष्ट्र मन्त्रालयको राजनीतिक र अन्तर्राष्ट्रिय सम्बन्ध निर्देशक, विश्वविद्यालयका डेपुटीभाइस चान्सलर र डिन, संयुक्त राष्ट्रसंघ संस्थाका निर्देशक, प्रतिष्ठित व्यक्तिहरू र जाम्बियामा रहेका नेपालीहरूको सहभागिता रहेको जनाएको छ ।
कार्यक्रममा गैरआवासीय नेपाली संघ राष्ट्रिय समन्वय परिषद् जाम्बियाका अध्यक्ष प्रोफेसर विशालनाथ उप्रेतीले कार्यक्रमको उद्देश्यमाथि प्रकाश पार्दै अतिथिहरूलाई स्वागत गरेका थिए । नेपालमा रहेको अद्वितीय पर्यटकिय आकर्षणका बारेमा उल्लेख गर्दै उनले उपस्थित पहुनाहरूलाई नेपाल आउन प्रोत्साहन गरे ।
नेपालको प्राकृतिक सुन्दरताको आकर्षण, विभिन्न सांस्कृतिक र भौतिक वातावरण, हिमालयको हिउचुली, विश्वको छत सगरमाथा, भगवान बुद्धको जन्मस्थान, गोर्खाली वीरताको इतिहास, विशिष्टतासहितको नेपाली झन्डा, पौराणिक र सुन्दरताको भूमिआदिका विषयमा पनि छलफल भएको थियो ।
अन्तमा, एनसीसी जाम्बियाका संस्थापक अध्यक्ष बिदुर खनालले उपस्थित अतिथिलाई धन्यवाद दिँदै कार्यक्रमको आयोजनका लागि नेपाली र दूतावास प्रिटोरिया, दक्षिण अफ्रिकालाई कृतज्ञता व्यक्त गरे ।