ग्यालेक्सी दक्षिण कोरियाकै मूल्यवान् ब्रान्ड
एजेन्सी
सोमवार, मंसिर १८, २०७४
30

सामसङ इलेक्ट्रोनिक्सको ग्यालेक्सी स्मार्टफोन यो वर्षको लगातार सातौं महिनामा पनि दक्षिण कोरियाकै सर्वाधिक मूल्यवान् ब्रान्ड भएको हालै प्रकाशित औद्योगिक प्रतिवेदनले जनाएको छ ।
औद्योगिक ट्र्याकर ब्रान्ड स्टकले देशका प्रमुख ब्रान्डहरूमा सञ्चालन गरेको अनुसन्धानले सामसङले सर्वाधिक अंक पाएको जनाएको छ । यो सूचीमा सामसङ २०११ देखि लगातार पहिलो स्थानमा कायम भएको हो ।
ग्यालेक्सी नोट सेभेन स्मार्टफोनको उत्पादन र बिक्री त्रुटिपूर्ण ब्याट्रीका कारण रद्द भएको अवस्थामा पनि सामसङ ग्यालेक्सीको भूमिका राम्रो भएको छ ।
आगामी वर्ष ग्यालेक्सी एस–९ स्मार्टफोन आउने अपेक्षाबीच पनि सामसङको साखमा वृद्धि भएको हो ।
दोस्रो स्थानमा ई–मार्ट रहेको छ । यसपछिको स्थानमा नाभेर रहेको छ । देशकै सर्वाधिक उपभोग भएको तयारी चाउचाउ सिन राम्युन आठौं स्थानमा कायम भएको छ । अमेरिकी प्रविधि कम्पनी गुगल १० औं स्थानमा कायम भएको छ । यो बजार मूल्यको आधारमा हो ।
दक्षिण कोरियामा सर्वाधिक प्रयोग गरिएको मोबाइल मेसेन्जर एप काकाओ टक केबी कुकमिन बैंक र इन्चिओन विमानस्थल सबै शीर्ष १० को सूचीमा परेका छन् ।
चिनियाँ बजारमा व्यापक रूपमा निर्भर रहँदै आएका अन्य ब्रान्डहरूको स्थान भने ओरालो लागेको छ । सोल र बेइजिङबीच थाडको विषयलाई लिएर चलेको विवादका कारण चिनियाँ बजारमा निर्भर रहँदै आएका ब्रान्डको सूची भने ओरालो लागेको हो ।
दक्षिण कोरियाले अमेरिकी क्षेप्यास्त्र प्रतिरक्षा प्रणाली आफ्नो भूमिमा परिचालन गरेपछि चीनले सुरुमा स्थानीय फर्महरूविरुद्ध आर्थिक प्रतिशोध लिएको थियो । यो क्षेप्यास्त्र प्रणालीलाई बेइजिङले सम्भावित त्रासका रूपमा हेर्दैै आएको थियो । चीनले पछिल्लो समयमा आएर दक्षिण कारियाप्रतिको प्रतिशोधमा आंशिक रूपमा कम गरेको छ ।
प्रमुख टुर एजेन्सी ब्रान्ड हानाटुर चार स्थान ओरालो झरेर २४ औं स्थानमा कायम भएको छ । यसैगरी कस्मेटिक ब्रान्ड सुल्हासो पनि ४ स्थान ओरालो झरेर २८ औं स्थानमा कायम भएको छ ।
चीनमा हुने बिक्री ओरालो लागेको समस्या भोगिरहेको हुन्डाई मोटर पनि १५ स्थान ओरालो झरेर ६२ औं स्थानमा कायम भएको छ ।