झापाको पूर्वी नाका काकँडभिट्टा–पानीट्यांकीसहित अन्य नाकाहरू बन्द
कारोबार संवाददाता
मंगलबार, मंसिर १९, २०७४
42

बिहीबार हुने प्रतिनिधिसभा तथा प्रदेशसभा निर्वाचनलाई मध्यनजर गर्दै भारत बंगाल राज्यको सीमासँग जोडिएको झापाको पूर्वी नाका काकँडभिट्टा–पानीट्यांकीसहित अन्य नाकाहरू बन्द गरिएको छ । सोमबार राति १२ बजेदेखि बिहीबार राति १२ बजेसम्म अर्थात् ७२ घण्टा १ सय १८ किलोमिटर नाका बन्द गरिएको झापाका प्रमुख जिल्ला अधिकारी क्रषिराम तिवारीले बताए । तीन दिनसम्म सवारी साधनसहित कुनै पनि व्यक्ति आवतजावत गर्न नपाउने जिल्ला प्रशासन कार्यालय झापाले जनाएको छ । अति आकस्मिक र व्यक्तिको संवेदनशीलता हेरेर प्रहरी, प्रशासनसँगको समन्वयमा आवतजावत गर्न दिइने प्रशासन कार्यालयले बताएको छ । बोर्डर सिल भएपछि भारतबाट नेपालतर्फ आउने पूर्वी नाकामा सुरक्षा कडा बनाइएको छ । उनीहरुलाई आवश्यक कागजात देखाएर सहज रूपमा नेपाल प्रवेश गराइराखिएको छ । झापा सीमा क्षेत्रमा तैनाथ नेपाल तथा भारत दुवै देशका सुरक्षाकर्मीले निर्वाचनलाई लक्षित गर्दै झापाको खुला सीमा क्षेत्रमा विशेष निगरानी बढाएका छन् । संयुक्त गस्तीमा नेपालको तर्फबाट अधिकृत स्तरका प्रहरीको कमाण्ड रहनेछ भने भारतीय तर्फबाट पानीट्यांकी, गलगलिया, देवीगञ्ज, भातगाउँ, ठाकुरगञ्ज, कादोगाउँलगायत थाना इन्चार्जको कमाण्डमा हुने प्रहरी कार्यालय झापाका एसपी विष्णुकुमार केसीले जानकारी दिए । झापामा मुख्य, सहायक, साना र रिफरेन्स गरी ९ सय ३ वटा सीमा स्तम्भ छन् ।